💐 گلہائے تعزیت💐
تلمیذ ومریدِ حافظ ملت ، فخر العلماء و القراء ، ماہر قرأت سبعہ و عشرہ، کثیر التلامذہ ، حضرت علامہ قاری و مقری نور الحق علیہ الرحمہ، استاذ جامعہ اشرفیہ مبارکپور کے وصال پر خراج عقیدت ،
یوم وصال 26 جمادی الاولی 1439ھج ...
13 فروری 2018ع ...
بروز منگل ...
🌟🌟🌟🌟🌟🌟
ضیائےفضل وکرم میں نہائیں نورالحق
لحد میں راحت و آرام پائیں نورالحق
سدا ہو جلوۂ فن ان کا زندہ وجاوید
دل ونظرمیں سدا جگمگائیں نورالحق
بلند ہوتے رہیں روز حشر تک درجات
بفیضِ سرورِ دیں ، مسکرائیں نورالحق
ٹہل ٹہل کے نظارہ کریں وہ جنت کا
پہن پہن کے بہشتی قبائیں نورالحق
چراغِ فن جو دلوں میں جَلائے ہیں تو نے
بجھا نہ پائیں گی انکو ہوائیں نورالحق
رہے گا ذکـر تـرا باغ اشـرفیّـہ میں
ہمیشہ گونجیں گی تیری صدائیں نورالحق
وہ پھول تو نےکِھلائے ہیں علم وحکمت کے
اثر کریں گی نہ جن پر خزائیں نورالحق
عجب وقار تری سادہ زندگی میں تھا
قلندرانہ تھیں تیری ادائیں نورالحق
تری چمک سے بڑھی رونقِ مبارکپور
ہیں منفرد تری علمی ضیائیں نورالحق
بڑےخلوص سےکی، تونے خدمتِ ملت
خدا عطا کرے انکی جزائیں نورالحق
بسےوہ گوہرِ تجوید اور قرأت تجھ میں
کہ جس سے قاری دلوں کو سجائیں نورالحق
تری جدائ پہ ارباب حق ہیں رنجیدہ
نہ بھول پائیں گے تیری عطائیں نورالحق
بَہار خلد سے مدفن ترا رہے معمور
کہ تیرے ناز فرشتے اٹھائیں نورالحق
سحاب فیض بنے دست تربیت تیرا
فریدی پر بھی ہوں تیری عطائیں نورالحق
🌟🌟🌟🌟🌟🌟
بحکم حضرت مفتی توفیق احسن برکاتی صاحب ،
استاذ جامعہ اشرفیہ مبارکپور .....
از محمد سلمان رضا فریدی صدیقی مصباحی بارہ بنکوی مسقط عمان
Join Us on Telegram
